Gizartearen karikatura

 

         Hibaiaren               hegaletako

             haltzak,               sahatsak eta

                     sasi                   kirikolaztuek

       zoroen keinu                    izugarriak

               egiten                    dizkidate.

    Ihauterietako               mozorroz

    jantzi ditu                  ur gaixoak

   (goitikoz                  eta behetikoz)

azkenengo                 euritearen

  ondorengo                goraldi bulartsuan.

    Kosmetiko               berri koloretsuz

      apaindurik                  dute zuhaitzek

    beren berezko                 edertasun ederra

           (liraintasun                  klorofilatsua),

                gaurko                 neskatilla lerden

          pailazotuen                 antzera,

                       gaurko                  politiko

                       gezurti           batzuk bezala,

                   gizon                     desgizatuen gisa,

          zeintasunik,                  zertasunik eta

              nortasunik                   gabe;

         eta farregarri                       ta negargarri

           bihurtu zaizkit                     hibai hegaletako

                       zuhaitz                        endakatuok.

                  Ez dute                       udaberriko

          jantzi dotore                          loratsurik;

    pinturaz                                eta ikatzez

        josiriko                               jantzi berriak

              dituzte                      soinean,

        eta anitz                     edergailu

      (uraren                     ume galduak)

   belarri                     eta eskuetan,

trapu zaharrez,              plastikozko botilaz

papel zaharrez                  eta gomaz

egindako bitxi                     nabarmenak

        (zibilizazio               eta teknikaren

simaur hatsitua,                gauzeztana).

   Organua jotzen              hasi da trumoia;

           hibaiaren                   ondoko lantegiek

intsentsu beltzez                     lurrinkatzen

              dituzte                          ura eta zuhaitzak;

                 lainoak                         negarrez daude;

                      eta ni                        hileta kantu bat

                    kantatzen                       hasi naiz

                 haltzen                        eta sahatsen

               eta sasi                             kirikolaztuen

    ihauterietako                            kalejira

itun eta                                      geldi hau

        ur                                    gaixoaren

   ondoan                                   ikustean.

 

 

© Mikel Zarate

 

 

"Bizipenen bultzadaz" liburua

"Mikel Zarate - Lan guztiak" orrialde nagusia