Paisaje piztuaren bozkariotan
Neguko urte latzen erdiminak
printz larriz zeuden gauaren irakiduran
eta eguzki berdearen itxaropen zoliak
urratu egin du beldurraren iluna;
txinta itoaren negar izoztua
lehertu egin da egunsentiaren sukarrean
ta garrasi dantzaz mailukatzen du
paisaje mozkortuaren algara.
Piztu egin da lehenaren burdinazko fenix zaharra
orainaren eztanda gorrizko hautsetan,
piztu, betiko geroaren amets zuritan,
piztu, bozkario berdearen argitan. |
© Mikel Zarate