Egiaren argi larden eta alai

nire bihotzaren poz zuri kutun,

gezurraren ilun zantar eta itun

nire bihotzaren min beltz etsai.

Argi ta ilunezko nahasmen hibai

nire bihotzean gau eta egun,

ta bide egitean... birle ezezagun,

aikomaiko, ezmez, zalantza, ezbai...

Uda eta negu, negu eta uda,

bihotz barnean dut beti duda

urduritasun huts mozkor hozkariz,

badaezpadako urrats traketsez,

zihurtasun bete baten gurariz,

betiko bizipoz baten ametsez.