Euskaldun «zaharrei».

Migel Perez nahi nuke izan,

Migel Perez Jimenez,

Migel Perez Jimenez Gonzalez,

Migel Perez Jimenez Gonzalez Lopez

izan nahi nuke

ametsezko mitoen zorabio gaixoa sendatzeko,

Euskal Herria euskaldunez betetzeko,

geu geutasun oso betean izateko.

Nire aitaren eta amaren,

aita eta ama maite-maiteen abizenak

aldatu egin nahi nituzke,

nire euskal deitura sakratuen suntsitzaile bihurtu,

Migel Perez Jimenez izan nahi nuke

Mikel Zarate Lejarraga izan beharrean...,

eta, naizena izanez,

euskaldun eta euskaltzale izanez,

Euskal Herri osora joan nahi nuke

Xabier Artaberen buztin lehor antzua haragitzera,

Altor Goirizelaiaren haragi gris hila biztutzera,

Mikel Pagonabarraga Gerrikaetxebarria Arteagoitia Gabilondo

erdaldun erdaltzale amorratuaren

arrazakeria zantar eta zikinaren

harrokeriazko deiturakeriaren

herensuge beltz luze zahar hondagarriaren

zazpi-buruak ebakitzera

behin betiko.