Maiteminduen lore ameslariak

 

Nire begietan

zure begi nini,

maitasun garretan

nengoen ni.

 

Maitasun garretan

bihotza erditzen,

zure begietan

jaio nintzen.

 

Biok elkargana,

biok elkarrekin,

begien imana

poz atsegin.

 

Neurea zaitut zu,

zeurea nauzu ni,

bitan bat gaituzu,

batetan bi.

 

Ai, nire Maiteder!

Zer esango dizut...?

Zu gabe ez naiz ezer,

maite zaitut.

 

 

© Mikel Zarate

 

 

"Higidura berdez" liburua

"Mikel Zarate - Lan guztiak" orrialde nagusia